Судалгааны тоо баримтаас харахад Ази, Өмнөд Азийн хөгжиж буй орнуудын хотуудад замын хөдөлгөөний дуу чимээний бохирдол хамгийн өндөр түвшинд байна. Энэ нь авто замын замбараагүй хөдөлгөөн, хуучин автомашины хэрэглээ болон дуут дохио тасралтгүй ашиглах дадалтай шууд холбоотой. Тухайлбал, Бангладешийн Дакка хотод замын шуугиан дээд талдаа 119 dB хүрч дэлхийд хамгийн өндөр үзүүлэлт заасан бол Энэтхэгийн Морадабад (114 dB), Пакистаны Исламабад (105 dB), Вьетнамын Хошимин (103 dB) хотууд араас нь бичигджээ.

Улаанбаатар хотын үзүүлэлтийг улаан өгнөөр ялган харуулав

Харин Европ болон Ойрх Дорнодын зарим хотод авто замын бүтэц сайтай, цахилгаан болон нийтийн тээврийг сайн хөгжүүлснээс замын хөдөлгөөний шуугиан харьцангуй бага байна. Тухайлбал, Иорданы Ирбид хотод замын шуугианы дээд хязгаар нь 60 dB байгаа бол Францын Лион, Испанийн Мадрид хотуудад 69 dB-ээс хэтрэхгүй байна. Европын Стокгольм, Белград зэрэг хотуудад ч замын шуугианы түвшин 70 dB орчимд баригдаж байгаа нь хурдны замын сүлжээг орон сууцны бүсээс тусгаарлаж, дуу чимээ тусгаарлах хаалт суурилуулсантай холбоотой.

2024 онд Улаанбаатар хотод автозам дагуух дуу чимээг нийт 12 цэг дээр 500 гаруй удаагийн хэмжилт хийж үзэхэд 74–98 dB хооронд хэмжигдсэн байна. Анхаарал татах гол үзүүлэлт нь Улаанбаатарын замын хөдөлгөөний хамгийн бага буюу суурь шуугиан (74 dB) нь Европын олон хотын хамгийн дээд үзүүлэлтээс ч өндөр байгаа явдал юм. Энэ нь манай нийслэлд замын түгжрэл, авто замын сүлжээнээс үүдэлтэй өдөр тутмын дуу чимээ тасралтгүй өндөр түвшинд хадгалагддагийг харуулж байна. (стандарт нь өдөртөө 60, шөнөдөө 45 децибел байдаг)