Тус улсад манай улсын Зэвсэгт хүчний цэргийн баг НҮБ-ын Аюулгүйн Зөвлөлийн 2025 оны 2793 дугаар тогтоолын хүрээнд НҮБ-ын дэмжлэгтэй “Гэмт бүлэглэлтэй тэмцэх хүчин” ажиллагаанд үүрэг гүйцэтгэх юм байна. 

Тус ажиллагааны хүчний штабын бүрэлдэхүүн 2026 оны 05 дугаар сард Хаити Улсад хүрэлцэн ирж, ажиллагааны төлөвлөлт, стратегийн үнэлгээ хийх, олон улсын цэргийн багуудыг хүлээн авах бэлтгэл хангах, цэргийн тусгай ажиллагааг удирдан зохион байгуулах чиглэлээр ажиллаж эхэлжээ. 

Ийнхүү Монгол Улсын цэргийн баг үндсэн бүрэлдэхүүнээрээ ажиллагааны газар оронд хүрэлцэн ирснээр манай алба хаагчид Эль Сальвадор, Гватемал, Чад, Ямайка, Шри-Ланка зэрэг улсын цэргийн алба хаагчидтай мөр зэрэгцэн үүргээ гүйцэтгэж эхлээд байгаа нь энэ аж. 

Монгол Улсын Зэвсэгт хүчний цэргийн баг дэлхийн бөмбөрцгийн баруун хагаст үүрэг гүйцэтгэж байгаа нь энхийг дэмжих болон олон улсын ажиллагаанд оролцсон 20 гаруй жилийн түүхэнд газар зүйн хувьд эх орноосоо хамгийн алслагдсан бүс нутагт үүрэг гүйцэтгэж буйгаараа онцлог бөгөөд олон улсын энх тайван, аюулгүй байдлыг хангах үйлсэд оруулж буй Монгол Улсын хувь нэмэр, цар хүрээ улам өргөжиж буйн илэрхийлэл болж байна гэдгийг онцлов.