Хэсэг хөгжөөн дэмжигчид энэ зорилгоор зочид буудлын ойролцоох гудамжинд орилж, хөгжим тоглож, салют буудуулж эхлэхэд цагдаа нар тэднийг албадан тараасан байна.

Английн багийн бэлтгэлийн баазаас өгсөн мэдээллээр бол энэ үйлдэл тамирчдын амралтад төдийлөн нөлөө үзүүлээгүй гэнэ.

Жагсаал цуглаан тараах өмсгөл, зэвсэг тоноглолтой цагдаа нар Английн багийн байрлаж буй зочид буудлыг хамгаалж, ойртох гэсэн хэнийг ч буцааж байгааг эх сурвалжууд мэдээлжээ.

Өнгөрсөн долоо хоногт шөвгийн 32-ын шатанд Мексикийн шигшээ баг Эквадорын шигшээг 2:0 харьцаатай хожсон юм. Үүний дараа Эквадорын албаныхан тоглолтын урд шөнө чанга яригч, мотоциклтой хөгжөөн дэмжигчид тамирчдын нойрыг алдагдуулсан талаар FIFA-д гомдоллож байв.

Үүний дараа Английн багийн хамгаалалтыг чангатгажээ.

Мексик, Английн шигшээ багууд Улаанбаатарын цагаар Даваа гарагийн өглөөний 8:00 цагт Мехико хотын Ацтека цэнгэлдэх хүрээлэнд тоглох юм.

Бямба гарагт Английн тамирчдыг өндөр хамгаалалтын дор төлөвлөгөөт бэлтгэлдээ гарах үеэр зочид буудлын гадна цугларсан хөгжөөн дэмжигчдийн зарим нь алга ташиж, зарим нь элдвээр хэлэн хашхирч байжээ.

Английн багийн ахлах дасгалжуулагч Томас Тухель хэвлэлд ярихдаа Мексикийн хөгжөөн дэмжигчдийн харилцааны талаар санаа зовнилыг үл тоомсорлож, харин ч зохион байгуулагч улсын иргэд төсөөлж байснаас илүү найрсаг хандаж байгааг сайшаасан байна.