Мэргэжлийн сүмогийн долдугаар сарын тэмцээн ид үргэлжилж буй. 

Өчигдөр макүшита зиндаанд унаагүй тэргүүлж явсан Набатамэ болон Асахифүжи Б.Очирсайхан нар хоорондоо таарсан юм. Энэ барилдаанд Набатамэ ялснаар таван даваатай тэмцээнийг үргэлжлүүлж байгаа бол Асахифүжи мэргэжлийн сүмод анхны ялагдлаа хүлээв.

Энэ оны нэгдүгээр сараас хойш мэргэжлийн сүмод хүч үзэх буй Асахифүжи Б.Очирсайхан түүнээс хойш 25 дараалан ялаад байсан юм. Дээрх хугацаанд доод гурван зиндаанд дараалан түрүүлж, энэ сараас макүшитагийн зүүний 11-ээс барилдаж байна.

Макүшитад эхний дөрвөн өдөр дараалан ялж, качигоши хийсэн ч өчигдөр унаснаар ялалтын цуврал нь зогсов. Хэрвээ аваргын төлөөх нэмэлт барилдааныг тооцвол 28-д хүрсэн юм.

Мэргэжлийн сүмод дөнгөж элссэн цагаасаа хойш хамгийн олон дараалж ялсан бөх бол Жокорюү. Тэрбээр 27 дараалсан ялалтаар тэргүүлдэг бол араас нь Итай, Точиазүма нар 26 дараалан ялжээ. Харин уг жагсаалтын дөрөвдүгээрт Асахифүжи Б.Очирсайхан бичигдэж байна.

Монгол сүмочдоос Токитенкү нэрээр барилдаж байсан А.Хүчитбаатар 22 дараалан ялснаар зургаадугаарт, Хокүсэйхо А.Даваанинж 21 дараалж ялснаар долдугаарт жагсдаг аж.