Энэ талаар Ерөнхий сайд Н.Учрал "Бизнесийн эрх чөлөөний тухай анхдагч хуулийн төсөл болон түүнийг дагалдуулан 99 хуулийн төслийг өргөн мэдүүллээ.

Ингэснээр хуулиар хориглоогүй аль ч салбарт ямар ч төрлийн үйлдвэр үйлчилгээ, худалдааг өөрийн хүсэл сонирхлоор эрхлэх боломжийг иргэд, аж ахуйн нэгжүүддээ олгож байна.

Цаашид төр дур зоргоороо бизнесийн үйл ажиллагааг хязгаарлахгүй. Олон улсад мөрдөж буй "No surprise" зарчмын дагуу бизнесийн үйл ажиллагаанд хязгаар саад болсон хориг зохицуулалт хийхгүй байхыг энэ хуульд тусгалаа.

Дагалдуулан өргөн мэдүүлсэн 99 хууль нь хөрөнгө оруулалтын орчныг сайжруулахад чиглэсэн. Тухайлбал гадаадын банк байгуулах эрх зүйн орчныг бүрдүүлж байгаа. Өнөөдөр хөрөнгө оруулагч нартай уулзсан. Бүгд Найрамдах Солонгос Улсын хоёр байгууллага хүсэлтээ илэрхийлсэн. Унгарын OTP банк Монголбанкны урилгаар ирэх гэж байгаа. Хууль эрхзүйн орчин сайжирснаар гадаадын банк байгуулах, үйл ажиллагаа явуулах боломж бүрдэх юм.

Банк санхүүгийн байгууллагын хямд эх үүсвэр татахыг дэмжих, иргэн, аж ахуйн нэгжид очих зээлийн хүүг бууруулах зорилгоор суутган татварыг 5 хувь болгон бууруулна. Зарим мэргэжлийн нэгдсэн холбоонд төрийн зарим чиг үүрэг буюу 120 гаруй зөвшөөрөл олгох эрх зүйн орчныг бүрдүүлж байна. 
IT-ийн компаниудыг сая өргөн мэдүүлсэн татварын хуулиар цахимаар бүртгүүлсэн тохиолдолд татвараас бүрэн чөлөөлж байгаа. Мөн дэвшилтэт технологи, хүнс хөнгөн үйлдвэр, аялал жуулчлал, үйлчилгээний салбар дахь ажилтныг ажлын байрны төлбөрөөс чөлөөлөх зохицуулалтыг тусгалаа.

Зөвшөөрөл авах процессыг хялбаршуулж, явцын хяналтыг сайжруулна. Татвар, нийгмийн даатгалын өрөөр шалтгаалан зөвшөөрөл олгохоос татгалздаг байдлыг энэ хуулиар зогсооно.

Тусгай зөвшөөрөл таван жилээр олгодог байсныг 10 жил болгож, явцын хяналтаар дүгнэнэ. Энгийн зөвшөөрөл гурван жилээр олгож байгааг таван жилээр олгодог болно. 

Бизнесийн эрх чөлөө бол компаниудын эрх ашиг биш. Ажлын байрууд, хөрөнгө оруулалт, шинэ санаа, шинэ үйлдвэр, шинэ үйлчилгээ юм" гэлээ.